KUALA LUMPUR, 19 Nov: Bisi 253,785 iku rayat Malaysia udah mujur bulih pengawa kenyau ari 1 hari bulan satu nyentuk ke 12 hari bulan 11 ke udah nengah portal pengawa menua tauka dikumbai MYFutureJobs.
Menteri Pengereja Pengawa Datuk Seri M. Saravanan madahka, pengawa meri kereja nya dipejalaika Gerempung Pengelikun Rama (PERKESO), ti mandangka perintah bebendar mantu rayat di menua tu.
“Ketegal pengekai COVID-19, beribu iku pekereja ari mayuh bengkah sektor ti nyengkaum dagang temuai, hotel, bilun sereta pengawa berumah tebunsa tauka lenyau pengawa,” ku iya madah.
Iya madahka, sepengudah belematika pemar enggau penusah ke ditapi rayat perintah nyendiaka bemacham inisiatif enggau bantu dikena nentuka rayat ulih neruska pengidup.
Tu nyerangkung program Subsidi Upah Perkeso ti udah mujur nyelamatka mayuh serikat malaysia ari bankrup enggau pekereja ari lenyau pengawa tauka asil penatai pemisi.
Kelimpah ari nya, Skim Insurans Pengawa PERKESO ti dibantaika ba taun 2018 udah mantu nyaga pekerja dibuai kereja sereta nyamin asil penatai pemisi sida seruran tejaga sepemanjai timpuh pandemik.
“Inisiatif perintah baka nya mantu perintah mulaika pemanah ekonomi menua sepengudah nerima empas ketegal pengekai COVID-19,” ku iya madah agi.
Iya munyi nya lebuh bejadika malam Anugerah Media Perkeso ke diatur malam Hari Empat.
Berindik ari nya, Saravanan madahka raban media ngesan tanggungpengawa ke beguna lebih agi mantu perintah nerangka senentang inisiatif ke dilancharka perintah dikena mantu rayat ke balat tebunsa sepemanjai timpuh pandemik.
