KUCHING, 18 Nov : Perintah Sarawak endang nyukung penuh inisiatif ejensi peribit ke meri duit turu ti nyengkaum deka ngemansangka makmal klon pun kayu ke sebagi ari chara nyungkak penumbuh sektor kayu ramu di nengeri tu.
Kepala Menteri, Datuk Patinggi Tan Sri Abang Johari Tun Openg madahka, pengawa tu seriris enggau siti ari pelasar Strategi Pemansang 2030 Pasca COVID-19 ti udah dilancharka perintah Sarawak sebedau tu.
Ku iya madah, Sarawak diatu bebendar deka ngemesaika agi pengawa ngalau enggau nyaga pemisi asil rampa menua di kampung enggau biodiversiti di serata nengeri tu.
“Kemaya hari, kitai deka chakah agi bejalaika pengawa nya nengah chara nanam pun kayu bansa Paulownia di nengeri tu ke dipeda ulih nyadi siti chara baru dikena nyaga pemanah rampa menua,” ku iya madah.
Iya mansutka jaku nya rambau dirandau pengarang berita sepengudah meda taba alai nanam pun kayu bansa Paulownia ti dipenggi TSG Green Sdn. Bhd. di Kota Samarahan sehari tu.
Nangkan ke nya, serikat nya ngemansangka Makmal Kultur Tisu RT Paulownia ti keterubah di Sarawak dikena nempa klon paung pun kayu nya awakka ulih dijual sereta dibekalka ke serata nengeri.
Abang Johari pechaya pengawa nanam pun kayu nya dijangka mantu nyungkak penumbuh industri kayu ramu di Sarawak.
” Ambika chunto, menua Scandinavian baka Finland enggau Norway, rayat di menua nya nanam pun kayu bansa Pine ti nyadi bekal ba dalam industri kayu ramu lalu di Sarawak kitai mega ngembuan polisi ke sama,” ku iya madah agi.
Berindik ari nya, iya pechaya industri kayu ramu di nengeri tu ulih ngerembai agi laban pun kayu nya jampat nyapai timpuh tuai ke ulih diguna ba dalam industri nya.
“Pun kayu tu ulih ditanam laban gaya tanah ke manah di nengeri tu sereta penumbuh pun kayu tu mantu nagang sereta nyerap gis karbon dioksida ketegal daun kayu nya besai sereta mayuh bengkah produk ke ulih diasilka baka perengka rumah,” ku iya madah.
