BINTULU, 15 NOVEMBER: Siku lelaki lunggar umur 60 taun di Bintulu dijil sepengelama 23 taun ketegal masung anak menyadi iya empu ke beumur 12 taun, lalu ngujungka nembiak indu nya betubuh bisi sepengelama empat bulan.
Luyar kort Syarifuddin Abdul Rasa udah netapka ukum ngagai lelaki nya ba baruh Seksyen 376 B(1) Kanun Keseksaan.
Bepelasarka seksyen nya iya ulih dijil sepengelama 10 nyentuk ke 30 taun sereta dilunsin.
Nitihka rikod, pengawa jai nya nyadi ba sebuah rumah panjai di Tatau lebuh 6 enggau 10 Jun 2021 apin lama ti udah, urung pukul 8 enggau 9 malam.
Anak menyadi iya maya nya deka nginjau telefon ari lelaki nya lalu iya mantaika video ke enda menuku sebedau masung nembiak indu nya.
