MIRI, 15 NOVEMBER: Kort majistret sehari tu udah netapka siku lelaki ditinggang ukum sereta dijil sepengelama semilan bulan ketegal deka munuh indai iya empu.
Majistret Leona Dominic Mojiliu udah netapka siku lelaki ke benama Paul Sanggir Jegon ti beumur 24 taun, asal ari Tudan Desaras Fasa Enam deka ditinggang ukum berengkah ari 12 Oktober 2021.
Paul, diukum ba baruh seksyen 506 penal kod, iya nya dijil sepengelama tujuh taun tauka mayar saman tauka kedua-dua nya sekali.
Bepelasarka rikod, siku indu ngaga ripot polis madahka anak iya empu deka ngachuk iya nguna pisu sereta ngemba deka munuh iya ba dapur rumah.
Insiden nya nyadi kena 12 Oktober 2021, urung pukul 8 pagi di Tudan Desaras Fasa Enam.
Polis beguai ngagai endur nya lalu ngetan lelaki nya urung pukul 5.40 lemai.
Entudika nya, polis mega udah ngerampas pisu sepemanjai 24 centimeter ti dipelabaka diguna lelaki nya.
Asil ari tasat, lelaki nya madahka diri iya ringat ketegal indai iya enda meri iya duit dikena meli utai ke enda patut.
ASP Koay Kok Ping ngamatka kes nya enggau lelaki nya nadai diarika sebarang luyar.
