SIBU, 15 NOVEMBER: Bisi dua iku nembiak baruh umur ditan maya operasyen trafik ti dipejalaika polis kena hari lima enggau hari enam minggu tu tadi, ketegal nguna chara ‘wheelie’ enggau ‘superman’ ba atas mutosikal ke dibai seduai nya.
Ku Sapit Tuai Polis Pelilih Sibu Superintenden Collin Babat madah, operasyen nya dipejalaika berengkah ari 8.30 malam nyentuk ke 12.00 tengah malam di Sibu Town Square, Jalai Bujang Suntong enggau Jalai Tun Ahmad Zaidi Adruce.
Kedua-dua nembiak nya beumur 18 taun nya mai mutosikal enggau chara ke salah, tauka ‘wheelie’ enggau superman di Jalai Bujang Suntong enggau Jalai Tun Ahmad Zaidi Adruce.
Beduduk ari nya, kedua-dua saspek ditinggang ukum ba baruh Seksyen 42 (1) Perengka Pengangkut Jalai Alun 1987.
Entudika nya, sepenyampau 67 iti saman sereta 13 iku orang ke mai mutosikal dikompaun sepemanjai operasyen nya dipejalaika.
Entara penyalah iya nya baka nadai ngembuan lisin , lumur plat kerita ti enda nitihka spesifikasyen ke udah ditetapka, nadai ngelekatka chukai jalai, ngubah ekzos kerita enggau nadai ngena tupi kaledar.
