TANJUNG MANIS, 14 NOVEMBER : Peranak ba semilan buah genturung pendiau di sitak parlimen Tanjung Manis udah enggau Program Bomba Komuniti enggau Fire Point sepengudah napi mayuh penusah angus sepemanjai satu taun tu tadi.
Entara semilan buah genturung pendiau iya nya Kampung Paloh, Berangan, Kedang, Serdeng, Sedau, Bakerkong, Teluk Gelam, Rumah Gabriel Sungai Lepah enggau Rumah Dadat.
“Peranak ba sitak parlimen Tanjung Manis udah napi mayuh kes penusah angus, entara chunto iya nya Rumah Panjai Stalon, Masjid Semop enggau kampung Sedi,”
Kaban Kunsil Parlimen Tanjong Manis, IR Yusuf Abdul Wahab madah munyi nya sepengudah benyadika pengerami nutup Program Bomba Komuniti enggau Firepoint ba Balai Mayuh Guna Industri Mit enggau Jelan Pemesai (PKS) Tanjung Manis, kemari.
Iya ngarapka program tu ulih dipejalaika enggau mayuh agi dikena peranak ba genturung pendiau ulih besedia napi penusah angus sereta penemu sentang kebuah nyadi penusah rumah angus.
Sebedau tu, IR Yusuf Abdul Wahab udah meri bantu duit turu sepenyampau RM 25,000 ngagai Balai Bomba enggau Penyah Penusah Tanjung Manis.
Duit turu tu dikena bejalaika program ngiri penemu kebuah penusah angus enggau ulih ngurangka penyampau kes angus kelebih agi sitak parlimen iya empu.
