MIRI, 14 NOVEMBER : Parti Rakyat Sarawak (PRS) deka terus meri sukung ngagai Ripin Lamat ngetankan kerusi Lambir maya Pengawa Bepilih Nengeri (PRN) Sarawak ke-12 tu ila.
Chairman PRS Lambir Pandang Semat madahka enggau mayuh agi orang tama ke dalam parti lebih agi raban nembiak rebak baru deka negapka sukung ngagai perintah Gabungan Parti Sarawak (GPS).
“Kami pechaya ADUN enggau Kaban Parlimen Sibuti ti udah ditetapka deka terus meri sukung ngagai parti PRS. Pengawa tu deka nentuka sukung ti rat ngagai semua komponen GPS.
“Enggau sukung entara komponen tu, kitai andal ulih menang DUN Lambir enggau majoriti ke lebih besai agi ba dalam Pengawa Bepilih Nengeri (PRN) Sarawak Ke-12 tu ila,” iya madah munyi nya sepengudah ngemataka pengawa nyerahka pom nyadi kaban PRS Lambir.
Kena 12 November apin lama ti udah, PRS Lambir udah nerima kaban baru ti udah diberi ngagai 70 iku peranak genturung pendiau di Rumah Etap, Sungai Banjong, Lambir.
Ripin ke mega chairman Parti Pesaka Bumiputra Bersatu (PBB) Lambir ngelalau mensia mayuh meri sukung ngagai GPS bepelasarka rikod ti manah ungkup sektor politik sebedau tu.
Ku iya madah, perintah GPS udah meri mayuh pemansang kelebih agi ngagai rumah panjai baka Rumah Etap enggau ke bukai.
Entara pemansang ke diberi iya nya ngulihka arus internet ti dikemataka suruhanjaya Komunikasi Enggau Multimedia Malaysia (SKMM) sereta nirika menara telekomunikasyen ba endur nya.
Iya ngarapka semua parti komponen ba dalam GPS terus meri kerejsama ngambika uliih menang ba kerusi DUN Lambir enggau majoriti ke lebih besai agi.
