KUCHING, 14 NOVEMBER : Siku nembiak mit ke beumur enam taun entara 16 iku Peranak Menua Luar Nadai Pemendar (PATI) diburu pulai pengudah nguji tama ke Sarawak nengah jalai pintas ba kebun sawit di Biawak, Lundu, lemai kena 13 November tu tadi.
Ku jurujaku sel perhubungan raya markas satu divisyen madah dalam siti penerang, seraban tim tetemuka 16 iku benung bejalai kaki nguji tama ke Malaysia ari menua Indonesia urung pukul 3.30 lemai.
Asil ari tasat, kesemua 16 iku nya nyengkaum 11 iku lelaki ke beumur entara 19 nyentuk ke 45 taun enggau empat iku indu ke beumur entera 21 nyentuk ke 39 taun enggau siku nembiak mit ke beumur enam taun.
Kesemua pati tu nadai ngembuan sebarang dokumen pejalai ke sah enggau tuju tama ke garis entara menua malaysia ketegal begigaka endur gawa di Sarawak.
Kesemua pati diburu pulai enggau ripot polis udah digaga ba Balai Polis Lundu dikena bejalaika atur ti patut.
Ku penerang nya madah agi, soldadu darat lebih agi raban ke gawa nyaga garis entara menua Sarawak-Kalimantan Barat seruran nyikap diri nyaga pengelikun dikena nyeliahka sebarang risiko penama pati ti ulih mai ba pengekai igi penyakit COVID-19.
