DEBAK, 5 NOVEMBER: Raban tuai enggau penyukung Parti Pesaka Bumiputera Bersatu (PBB) udah dipinta nyikap diri napi Pengawa Bepilih Nengeri ke-12 ti deka diatur enda lama agi.
Sapit Kepala Menteri Datuk Amar Douglas Uggah Embas ke mega Sapit Presiden PBB nyemetak madahka, PRN Sarawak serak tu deka napi mayuh macham pemar baru.
“Menua diatu agi betapi enggau pandemik COVID-19. Bisi sekeda kandang endur diempang.
“Ambika chunto kitai enda dikemendarka ngatur pengawa begelumu bejalaika kimpin baka ke diatur kitai sebedau tu.
“Beduduk ari nya, kami deka nguna pelantar media rama, aum video enggau ke bukai maya deka ngenataika pesan tauka penerang ngagai pengundi,” ku iya madah.
Uggah madahka, chara ke betul mesti dikemeratka lebuh bekunsika penerang pemadu baru senentang polisi enggau perambu perintah ngagai rayat ngambika bulih sukung ari sida.
Lebuh nerangka senentang pengawa bepilih nengeri, iya madahka Opis Menteri Pengerai Malaysia (KKM) enggau Komiti Pengawa Bepilih Besai (SPR) deka netapka Standard Atur Pengawa (SOP).
“Semua pekara ke ditetapka sida mesti dititihka kitai laban tu ungkup pengelikun semua,” ku iya madah lebuh ngulu program randau begulai enggau rayat ba Rh.Legum di Serugup lebuh Hari Empat.
Nangkan ke nya, Kaban Kunsil Nengeri (ADUN) Saribas Mohd Razi Sitam enggau Sekretari Politik Kepala Menteri Dr Richard Rapu bisi datai ngulu program nya.
Uggah pechaya pengundi di Saribas sekali agi deka ngaga pemutus ke betul.
“Rakyat Saribas seruran nyukung perintah ba dalam pengawa bepilih nengeri sebedau tu.
“Aku pechaya sida deka terus nyukung perintah maya PRN ti deka datai laban sida agi begunaka mayuh pemansang,” ku iya madah agi.
Ba dalam program nya, iya udah ngemendarka geran perintah sepenyampau RM128,000.00 ungkup projek ngaga selapat bah, jalai ladang enggau duit turu ungkup Komiti Pemansang enggau Pengelikun (JKKK) rumah panjai sereta biro orang indu.
