KUCHING, 5 Nov: Kepala Menteri, Datuk Patinggi Abang Johari Tun Openg sehari tu madahka senentang Kunsil Nengeri (DUN) Sarawak udah direrak dikena meri awak ngagai Pengawa Bepilih Nengeri (PRN) Sarawak ke-12 ulih diatur dalam timpuh 60 hari.
Abang Johari ke mega Chairman Gabungan Parti Sarawak GPS madahka, pekara nya udah dipejalaika kena 3 November 2021 ke udah.
Pekara nya dipadahka iya berindik ari Proklamasyen Darurat Sarawak diketuka sepengudah dipadahka Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah sepengudah berunding enggau Tuai Pemegai Menua Nengeri Sarawak, Tun Pehin Sri Abdul Taib Mahmud.
Berebak ari nya, Abang Johari madahka Speaker DUN, Datuk Amar Mohamad Asfia Awang Nassar deka mai pengerembai pekara nya ngagai Komiti Pengawa Bepilih Besai (SPR).
Lebuh ditanya senentang kemaya hari bulan PRN deka diatur, iya madahka pekara nya bepanggai ba Komiti Pengawa Bepilih Besai (SPR).
Kelimpah ari nya, iya nerangka senentang perintah ba baruh iring Gabungan Parti Sarawak (GPS) enda berumban baban ngatur PRN laban ngemeratka pengelikun enggau pengerai mensia mayuh.
“Taja pia, Sarawak sedia ngatur PRN berindik ari tikas tauka taka program betuchuk vaksin di nengeri tu entara ke pemadu tinggi sereta udah nyapai tikas imuniti beraban,” ku iya madah ba aum media ke diatur ba Wisma Bapa Malaysia sehari tu.
Ku iya madah agi, PRN nya mesti diatur dikena nyamin kuasa rayat Sarawak milih perintah nguna chara demokrasi seriris enggau Demokrasi Beparlimen.
