SERIAN: Penusah jalai alun nyadi di Kilometer 5 Jalai Serian-Tebedu ngaul siku pengajar ti ngujungka iya balat bakal ba penusah nya.
Ketuai Opis Tasat enggau Penerit Trafik Sarawak Superintenden Alexson Naga Chabu, madahka maya penusah nya nyadi, tudah ke benama Nur Amiza Amira Abdullah, 29 deriba kerita ari Serian nuju ke Sekula Sekondari (SMK) Tebedu alai iya ngajar urung 7.20 pagi.
“Penusah jalai alun nyadi lebuh kerita tudah enda ulih ditagang ngujungka tepawah ke tisi jalai enggau ngelanggar culvert (pembetung) konkrit ba jalai alun nya,” ku iya dalam siti penerang.
Tudah ke asal ari Kampung Pangkalan Kuap, Kota Samarahan disahka parai pengudah diperesa pengereja pengawa Opis Menteri Pengerai Malaysia (KKM) ti datai ba palan penusah jalai alun nya.
Bangkai tudah lalu dianjung ke Opis Perubat Forensik Sepital Serian ngambi ulih bejalaika atur ke patut.
Kes ditasat ba baruh Seksyen 41(1) Akta Perengka Pengangkut Jalai 1987.
