KUCHING, 4 NOVEMBER: Perintah Sarawak deka terus ngemeratka pengawa nyaga pemanah rampa menua ba dalam agenda pemansang nengeri, ku Kepala Menteri Datuk Patinggi Abang Johari Tun Openg.
Iya madahka, naka ke diatu udah bisi sekeda inisiatif ti mekuhka pengawa nyaga pemanah rampa menua udah dipejalaika di Sarawak ti nyerangkung meransang penumbuh ekonomi hidrogen.
“Aku arapka tunga tuju tu deka ngangkatka Sarawak setanding enggau menua luar bukai ba dalam pengawa nyaga pemanah rampa menua ba dalam perambu pemansang nengeri kitai,” ku iya madah lebuh bejaku ba pengerami besainka kunterik entara Brooke Dockyard & Engineering Works Corporation enggau Sarawak Shell Bhd sehari tu.
Kunterik ke disain nya ungkup pengawa injinier, pengulih enggau pengawa berumah (EPC) ke ngaul kereja strakcha luar tebing tasik tetap dikena ngemansangka tegalan gis Timi Shell kira-kira 200 kilometer luar tebing tasik Miri.
Berebak ari nya, Abang Johari madahka iya gaga ati tegalan Timi iya nya tegalan sweet gis ti ditemu maya taun 2018 nyadi pelantar pala telaga keterubah Shell di Malaysia ti nguna kuasa ulih diguna baru hibrid solar enggau angin.
“Aku deka muji Shell laban udah ngemunka singkang ke berani baka tu seriran enggau agenda ekonomi gadung nengeri enggau baka ni chara kitai deka nuju ubah kuasa ke lebih jampat.
“Aku mega nganti pengawa meranak puku ari Shell ti deka datai di Bintulu ungkup loji gis darat enggau siti agi perengkaguna di luar tebing tasik ba taun bukai ti deka datai,” ku iya madah agi.
