KUALA LUMPUR, 4 NOVEMBER: Taja pan nama Gabungan Parti Sarawak (GPS) semina ditumbuhka kena taun 2018, tang parti nya udah ngerikodka mayuh pemujur lebuh bejalaika pengawa maya nyadi perintah nengeri Sarawak.
Kelimpah ari nya, rikod servis tauka pengawa parti bukai ba dalam parti nya ti nyerangkung Parti Pesaka Bumiputera Bersatu (PBB), Parti Rakyat Sarawak (PRS), Parti Demokratik Progresif (PDP) enggau Parti Rakyat Bersatu Sarawak (SUPP) dipeda ulih nyadi aset sereta modal besai ba dalam Pengawa Bepilih Nengeri (PRN) ke-12 ti deka diatur enda lama agi.
Sekretari Besai GPS Dato Sri Alexander Nanta Linggi madahka, senentang pengandal parti nya megai mandat baru Di Sarawak dalam timpuh lima taun ti deka datai taja pan parti nya keterubah bejalai kediri sepengudah pansut ari Barisan Nasional (BN) kena bulan Jun 2018 sereta enda agi nguna simbol dacing beserimbai enggau PRN serak tu.
“Aku enggai naga berapa penyampau kerusi ke ulih menang, tang bekau rikod kitai iya nya modal besai.
“Tebal agi, dalam timpuh dua tiga taun ke udah mayuh projek pemansang udah dikemendarka perintah nengeri,” ku Nanta madah lebuh dirandau pengarang berita apin lama ke udah.
GPS deka betanding ba semua 82 kerusi Kunsil Nengeri (DUN) maya PRN ke-12.
Nanta ke ngerejister GPS enggau logo parti nya madahka, taja pan logo Kenyalang ke diguna nya dipelabaka meri penyaru mimit ngagai pengundi, tang iya pechaya pekara nya enda ngirauka ati laban rayat nemu sapa orang ke bendar gawa.
‘Chalun baru ke bediri maya PRN tu ila engka deka napi pemar, tang raban nembiak baru ke ransing sereta regas mesti diberi peluang nyadi chalun,” ku iya madah agi.
