MIRI, 3 NOVEMBER: Sarawak diatu mujur ba penuduk lumur satu bejalaika Kimpin Nanam 100 Juta Pun Kayu ba baruh program Ngadungka Malaysia sepengudah udah nanam 6,791,146 pun kayu kenyau ari program nya dilancharka ba pun taun tu.
Direktor Kampung Sarawak Datuk Hamden Mohammad madahka, Sarawak tumu agi bejalaika program tu kenyau ari taun 2019 lalu naka taun siti nyin kemari bisi 10.4 juta pun kayu udah mujur ditanam.
“Bepelasarka rikod nya, aku pechaya kitai ulih nanam 35 juta pun kayu ke diagihka ngagai Sarawak dikena nyapai misyen 100 juta pun kayu taja pan benung napi pandemik COVID-19 ini,” ku iya madah lebuh bejaku ba Pengerami Ngelancharka Le Tour de Restoration Bagi Menua Miri sehari tu.
Nangkan ke nya, bepelasarka penerang ari laman web www.100jutapokok.gov.my, Sabah ba penuduk ti kedua sepengudah udah nanam 4,061,492 pun kayu, dientudi ke Kelatan udah nanam 1,894,487 pun kayu, Perak udah nanam 1,863,029 pun kayu enggau Pahang udah 1,420,848 pun kayu.
Program Ngadungka Malaysia berengkah dipejalaika ari taun 2021 nyentuk ke 2025 ti mai tuju dikena nambahka pemereti ati mensia mayuh senentang mesti nyaga rampa menua enggau kampung ungkup pengelantang semua.
“Pengawa baka tu mega mantu nambahka kualiti pengidup seraya ngemanahka ekosistem enggau biodiversiti menua kitai.
“Program tu mekuhka pengawa nanam pun kayu menua baka merbau enggau bansa kayu bukai ke majak bekurang, seraya mensia mayuh ti nyerangkung sektor peribit sereta Gerempung Ukai Dikuasa Perintah (NGO) diperansang nanam pun kayu,” ku iya madah agi.
