KUCHING, 3 NOVEMBER: Pengawa meri basa kepenudi ngagai niang Sapit Kepala Sarawak Tan Sri Dr James Jemut Masing di Association of Churches in Sarawak (ACS) ba Jalai Stampin deka diatur nyentuk ke pukul 2 lemai sehari tu.
Ngambi penerang ari Unit Komunikasi Awam Sarawak (UKAS) sehari tu madahka, pengawa nya berengkah ari pukul 9 pagi tadi ke bisi digulu Kepala Menteri Datuk Patinggi Abang Johari Tun Openg, Sapit Kepala Menteri Datuk Amar Douglas Uggah Embas, raban menteri Kabinet, sereta kaban belayan niang ke bukai.
Kelimpah ari bala pemesai, tuai opis perintah, mensia mayuh mega diberi peluang meri basa ti kepenudi ngagai niang.
“Niang James Jemut Masing deka dibai ke Nirvana Memorial Park, Kuching lalu pengawa ngubur niang dipejalaika sepengudah pengawa meri basa kepenudi niang tembu pukul 2 lemai sehari tu,” ku penerang nya madah.
James Jemut Masing ke mega Kaban Kunsil Nengeri (ADUN) Baleh ke beumur 72 taun midang di Palan Perubat Normah Sarawak (NSMC) di Petra Jaya, Kuching urung pukul 7.05 lebuh Hari Minggu.
Presiden Parti Rakyat Sarawak (PRS) nya dipasuk ke Unit Sakit Raya (ICU) Sepital Besai Sarawak maya bulan September ke udah sepengudah ditetapka positif COVID-19.
“Niang udah nya dipindahka ke NSMC ngambi diperubat enggau silik agi,” ku iya madah agi.
