KUCHING, 3 Nov : Kaban Kunsil Nengeri (ADUN) Kakus, Datuk John Sikie Tayai, bekelala enggau niang Tan Sri Datuk Amar Dr James Jemut Masing kenyau ari taun 1989.
Ku iya, niang siku orang ti chukup nelap. Taja pia, iya siku orang ke ngengkang penemu. Niang mega lebuh berandau enda kala enda nyebut senentang pemansang orang ke diau ba menua pesisir, kelebih agi komuniti bansa Iban.
Sikie ke mega Menteri Muda Ba Opis Kepala Menteri ( Undang-Undang Enggau Adat Bumiputera ) madahka niang suah madahka diri deka ngubah pendiau pengidup bansa Iban ngambika bansa Iban ulih nambahka penatai pemisi diri empu.
Bala anak mega mesti pandai besekula ngambika bulih pengidup ti meruan, ku iya.
Niang nyadi ADUN Baleh kenyau ari taun 1983, lalu ngelama urung 38 taun, iya udah meri pemansang kelebih agi ungkup rayat ti diau ba sitak nya.
Niang mega nyadi Presiden Parti Rakyat Sarawak (PRS) ngelama urung 17 taun, kenyau ari PRS ditumbuh kena 21 Oktober 2004.
Lebuh ditanya senentang jaku ti penudi niang ngagai iya, iya madahka kitai anang enda begempung ati.
“Jaku kepenudi disebut iya ba opis kami ditu. Nyadi utai ti suah dipadah iya ngagai bala ia nya kitai mesti begempung. Begempung dalam siti parti, awak ka kitai tu tadi tau nyadi kering, tau kuat sereta nyadika chunto, begempung enggau diri sama diri. Lalu pia mega, kitai tu tadi patut sama bela gawa enggau pangan diri. Nya pekara ti diajar iya,” ku Sikie.
Nangkanka nya, Sikie enggau ai mata madahka niang suah mesan ngambika anang enda ingatka bansa Dayak, kelebih agi bansa Iban.
Pekara ti suah endar disebut niang Tan Sri Datuk Amar Dr James Jemut Masing ti nyemetak endar didinga, ku Sikie, ia nya anang ngena telefon agi enti kitai enda nemu nyaut telefon.
“Tu siti ari pekara ti diajar iya. Enti orang bisi telefon ngagai kita, lalu kita enda sempat nyaut telefon nya, tang udah nya kita enda telefon pulai ngagai orang nya, anang ngena telefon nya agi kita. Tau buai tauka tukar aja,” ku iya lebuh dikerandau pengarang berita TVS.
Jaku tu ngayanka niang Tan Sri Datuk Amar Dr James Jemut Masing endang siru sereta seruran deka mantu mutarka penusah ti ditapi rayat.
Ke rikod, niang Tan Sri Datuk Amar Dr James Jemut Masing endang siku anak Iban ari Kapit ke keterubah bulih ijazah Doktor Falsafah (PhD) dalam bidang antropologi ari Australian National University ba taun 1981. – TVS
