SARIKEI: Kaban Kunsil Nengeri (ADUN) Pakan, Tan Sri William Mawan Ikom bisi ngelimpangka diri betemu enggau peranak Sungai Rusa, Pakan di Rumah Asap Nanga Litok, Ulu Julau kena Hari Minggu.
Seraya ke bejalai betemu rayat, ba pengawa nya mega Mawan bisi nyuaka geran Projek Mit Pemansang Menua Pesisir (MRP ) ngagai Tuai Rumah Garan.
Sepenyampau RM5,500 geran MRP diungkupka ti meri pemaik ngagai 11 pintu rumah panjai sungai rusa pakan dikena bejalaika aktiviti sida.
Tuai Rumah Garan gaga ati sereta Mawan ulih limpang betemu enggau sida enggau datai nyuaka bantu.
Garan ti mega siku ari peranak menua Sungai Rusa, Pakan ti udah pichin gawa perintah lalu diatu bejalaika pengawa dagang.
Ke diatu, Garan bisi ngaga dagang rumah asap nyengkaum bisi nyendiaka palan alai ngelantangka ati baka kerangan alai mandi enggau rumah tumpang endur bemalam ngagai temuai.
Berebak enggau nya, sida endang tetap meri sukung penuh ngagai Mawan nyadi chalun Gabungan Parti Sarawak ba sitak Pakan berindik ari mayuh pemansang udah dibai iya ba sitak nya.
