(Gambar atas: Uggah nyuaka cek geran ngagai ADUN Balai Ringin, Datuk Snowdan Lawan.)
KUCHING, 30 Okt: Perintah Sarawak kemari nyuaka geran RM15 juta ngagai 123 iti sekula misin ba selampur nengeri.
Ia mega ngagih geran tambah RM7 juta ngagai 55 iti rumah sembiang ukai Islam nengah Unit Pengarap Bukai (UNIFOR) ba Opis Kepala Menteri.
Sapit Kepala Menteri ke mega menteri ke nguasa UNIFOR, Datuk Amar Douglas Uggah Embas meri semua geran nya ba opis iya ngagai Kaban-Kaban Kunsil Nengeri (ADUN) tauka wakil sida ke nerima geran ngarika sekula Katolik, Anglikan enggau Methodist sereta rumah sembiang.
Dalam jaku iya lebuh pengawa nyerahka geran nya, iya madahka geran nya sekali agi mantaika polisi inklusif Perintah Nengeri ti dipegai Gabungan Parti Sarawak (GPS).
Uggah madah Kepala Menteri, Datuk Patinggi Abang Johari Tun Openg, ngagihka RM50 juta ngagai UNIFOR ungkup taun 2021 ngambika unit nya ulih ngereja pengawa ti udah diberi ngagai sida.
Ku Uggah agi, tu meh keterubah ia UNIFOR meri geran ngagai sekula misin, enggaui geran keterubah RM15 juta.
Iya mega madah sekula misin tau ngandalka mayuh agi geran ti baka nya ila.
Perintah Nengeri, ku iya, mega udah nyediaka RM5 juta agi kena nulung rumah sembiang ti nadai penatai pemisi ari pemeri duit ti diteima ninting minggu ketegal pandemik COVID-19.
“Tuju ia kena mayar kos operasi sida enggau belanja bukai. Kitai deka ngagih duit tu enda lama agi,” ku Uggah.
Uggah amat beterimakasih ngagai Kepala Menteri ke nyaga enggau manah sereta ngemeratka sekula misin enggau rumah sembiang ukai Islam. – TVS
