KUCHING: Menteri Kanan Kereja Raya, Dato Sri Fadillah Yusof mandangka Bajet 2022 mekuhka ngagai pengawa mulaika pemanah menua enggau ngemeratka pengelantang rayat,
Tu nyata dipeda nengah Bajet 2022 nya, nyau deka semua nengeri nerima agih belanja lebih enti dibanding enggau taun ke udah sebedau tu.
“Sarawak enggau Sabah entara nengeri ti nerima agih belanja ke pemadu tinggi,”ku iya dalam siti penerang.
Nitihka dalam siti penerang, Fadillah madahka perintah mega ngemeratka sektor begaga rumah dalam Bajet 2022 ke alai Opis Menteri Kereja Raya nerima RM7.306 bilion ringgit ungkup taun 2022.
Bajet ngatur KKR ti udah bulih pemendar iya nya RM823 juta dibanding enggau RM1.26 bilion taun 2021.
“Kelimpah ari nya, Bajet Pemansang Taun 2022 ti udah dikemendarka nambah RM6.483 bilion dibanding enggau RM6.088 bilion ba taun 2021,”ku iya.
Ku Fadillah madah, perintah deka neruska projek pemansang infrastrakcha sepenyampau RM3.5 bilion ti mungkur pengawa ngaga Jalai Besai Pan Borneo enggau Jalai Central Spine.
Tambah mega, sepenyampau RM200 juta diungkupka nengah penumbuh Dana Mudah Cara Infrastruktur Ketiga nyengkaum RM2.9 bilion dikena bejalaika projek mit enggau jelan pemesai khas ngagai kunteriktor kelas G1 ke G4 di serata menua.
Ba awak ke sama, Fadillah madah, sektor begaga rumah deka terus dikemerat nengah sekeda inisiatif ti nyadi penyungkak besai ba ekonomi menua.
Entara inisiatif tu iya nya projek mit ungkup penyereta Bumiputera penyampau RM200 juta, Accelerator Programme nengah CIDB ngagai kunteriktor nembiak G1-G4 nengah kus ngangkatka kapasiti enggau on-job training penyampay RM10 juta, program negapka pelajar nyengkaum bidang teknikal enggau vokasional (TVET) dikena nangkup guna industri enggau agih belanja RM6.6 bilion.
