KUCHING: Serakup Pengajar Sarawak (STU) nyambut manah enggau beterima kasih ke penyiru perintah besai beratka pemansang sektor pelajar.
Presiden STU, Adam Prakash Abdullah madahka, agih belanja RM52.6 bilion dalam Bajet 2022 dikearapka Opis Menteri Pelajar (KPM) ulih ngenyampatka semua perambu dikena nentuka tunga kuing KPM lanchar.
Perintah mega nyendiaka insentif Alat Bantuan mengajar RM100 sekali bayar ngagai lebih 400,000 iku pengajar di serata menua kelimpah meri Bantuan Awal Persekolahan penyampau RM150 .
“Kitai mega meri terima kasih ngagai perintah laban ngambi kira perengka ke diguna nembiak sekula, nya alai perintah ngungkupka bantu RM150 ngagai tetiap iku nembiak,”ku iya lebuh dirandau kena Hari Enam.
Iya ngarap bantu nya ulih ngelempungka tating belanja ke ditapi apai indai lebih agi tekeruga ketegal pandemik Covid-19.
“Kitai mega ngarap nengah agih belanja (Bajet 2022) tu ulih ngelengkaska semua perambu ba renggat ba renggat perintah besai enggau nengeri dikena nentuka pekara pelajar di Malaysia lanchar,”ku iya.
