KUCHING, 29 Okt: Agih Belanja 2022 dikearapka ulih ngerapitka takah dalam mayuh macham pekara ti mungkur pemansang ba mengeri enggau menua pesisir di Sarawak.
Ku Felo Kanan Kaunsil Profesor Menua, Dr Jeniri Amir, Agih Belanja 2022 mesti ngungkupka agih belanja ti besai ngagai sekula di Sarawak kena nyendiaka perengkaguna ti lebih manah lebih agi kelimpah ari nyeruri sekula repuk enggau ngaga sekula baru ba kandang menua pesisir.
“Nya entara pekara ti pemadu beguna, ia nya baka ni belanja deka diagih ngagai Sarawak ti ukai semina ngerapitka takah bida infrastrakcha tang nyengkaum ari sukut sosial sereta baka ni ekonomi ulih mantu ngurangka isu penyeranta.
“Pia mega, agih belanja serak tu dikearapka ulih ngeranchakka agi pemansang ekonomi, pengawa betanam betupi enggau sukut bukai,” ku Dr Jeniri agi.
Iya madahka, pengawa baka nya mesti chakah dipejalaika nengah komitmen nyendiaka ungkup ti besai kena nentuka Sarawak angkat mansang sepengudah napi pandemik COVID-19 seraya nentuka nengeri Sarawak terus mansang manggai ba taun 2030.
Dr Jeniri mega ngarapka agih belanja mekuhka pengawa ngemanahka sektor dagang temuai di Sarawak.
Kelimpah ari nya, iya nerangka senentang sektor dagang temuai chukup beguna sereta mesti nerima perati ti patut kena nambahka perengkaguna dalam sektor dagang temuai.
“Taja pan pia, pengawa ngiga sereta mansutka produk baru di Sarawak kena matak penatai temuai ari dalam enggau luar menua mega mesti ditambah,” ku iya agi.
Beduduk ari nya, sektor dagang temuai di Sarawak diarap majak ngerembai ngambika mantu ngangkat tikas ekonomi rayat. – TVS
