KUALA LUMPUR , 29 Okt : Perintah deka terus meri bantu dikena mulaika pemanah menua nengah Agih Belanja 2022.
Sepemanjai timpuh pandemik, raban nembiak universiti mengkang neruska pelajar sida enggau gaya hidup ke baru tauka dikumbai norma baru. Ungkup nembiak ti datai ari ruang bilik ti ngembuan kurang penatai pemisi sida nginjau kereban dikena belajar ari kaban sida lalu bisi mega dipeda belajar ba palan internet di pasar dikena nembuka pengawa pelajar sida.
Bisi mega entara sida ke enda ulih ngulu kelas sechara dalam tali arus tauka online.
Enggau nya, Perintah enggau kerejasama serikat telekomunikasyen ti udah ditetapka deka bejalaika inisiatif PerantiSiswa Keluarga Malaysia bagi nyendiaka sebuah tablet ungkup tetiap iku nembiak ba baruh kategori B40 di institusyen pelajar tinggi ngambika sida terus mekuh ba bidang pelajar sida enggau lantang.
Ku Menteri Pekara Wang, Tengku Datuk Seri Zafrul Tengku Abdul Aziz madahka maya mantaika agih belanja 2022, perintah deka nyendiaka ungkup penyampau RM450 juta ke alai serikat telekomunikasyen mega mantu kira-kira 65 juta ringgit ti deka meri pengelantang ngagai urung 600 ribu nembiak ti datai ari ruang bilik dalam kategori B40.
“ Tetiap iku nembiak ti datai ari ruang bilik kategori B40 di institusyen pelajar tinggi deka nerima bantu sebuah tablet dikena sida iya belajar “, ku iya lebuh mantaika agih belanja 2022.
