SARIKEI: Kaban Kunsil Nengeri (ADUN) Pakan, Tan Sri William Mawan Ikom udah nyuaka geran Projek Mit Pemansang Menua Pesisir (MRP) sepenyampau RM5,000 ngagai Biro Indu Rumah Juni, Ulu Pedanum, Pakan sehari tu tadi.
Pengawa nyuaka geran nya dipenyadika Mawan empu pengudah ngelimpangka diri betemu enggau Biro Indu Rumah Panjai Juni ba Palan Servis ADUN Pakan.
Ku iya madah, bantu geran nya diberi ngambika ulih diguna Biro Indu Rumah Panjai Juni ngatur aktiviti sida.
Berebak enggau nya, pengari biro indu Rumah Juni meri besai terima kasih ngagai Mawan ti siru ke rayat sitak iya ti begunaka agih belanja nya lebih agi peranak rumah panjai.
Sida endang bisi pengarap besai ngagai Mawan nyadi pengari rayat sitak nya ba penggal dudi ila sereta meri sukung penuh ngagai perintah nengeri Sarawak ba baruh iring Kepala Menteri Sarawak, Datuk Patinggi Abang Johari Tun Openg.
Sama bisi datai ba pengawa nyuaka geran tu iya nya Penghulu Dandan Bujang.
