KUCHING: Perintah Sarawak enggau kerejasama Opis Menteri Pemansang Menua Pesisir (KPLB) deka numbuhka sistem data raya bekaul program pemansang Sarawak.
Semua program pemansang di Sarawak deka nyadi mudah dipejalaika nengah sistem nya ba renggat KPLB.
Menteri KPLB, Datuk Seri Mahdzir Khalid madahka sistem data raya nya ila ulih nyeliahka sebarang penanggul enggau ngemuntangka penagawa matau projek ke benung dipejalaika.
“Aku udah baum enggau Ketuai Sekretari (Datuk Ramlan Harun) ke alai kitai setuju deka ngemansangka siti sistem data raya kolaborasi enggau Sarawak, reti nya kitai bekunsi data baka bekal elekterik, bekal ai, jalai alun, jalai genturung pendiau, ameniti rama enggau rumah Projek Rumah Seranta (PPRT),” ku iya ba aum media pengudah nemuai meri basa ngagai Kepala Menteri Sarawak, Datuk Patinggi Abang Johari Tun Openg di Wisma Bapa Malaysia, sehari tu tadi.
Ku iya madah, KPLB mega ngambi kira perambu perintah Sarawak deka nentuka program pemansang nitihka gaya sesebengkah kandang menua.
Sama bisi datai iya nya, Sapit Menteri Pemansang Menua Pesisir Ii Datuk Hasbi Habibollah, Menteri Muda Betanam Betupi, Tanah Adat enggau Pemansang Kandang Menua Sarawak Datuk Dr Abdul Rahman Ismail enggau Ketuai Sekretari KPLB, Datuk Ramlan Harun.
