KUALA LUMPUR, 21 Oktober: Polisi Ngurangka Risiko Penusah Ngenyit Menua ti benung dikemansangka Ejensi Mutarka Penusah Ngenyit Menua (Nadma) dipeda ulih negapka pengatur enggau ngemanahka pengawa sedia napi risiko penusah ngenyit menua.
Ngambi penerang ari Bernama, Menteri Besai Datuk Seri Ismail Sabri Yaakob madahka, kelimpah ari ngemanahka pemereti senentang risiko penusah ngenyit, polisi nya ulih nambahka pengawa meranak puku ba dalam inisiatif ngurangka risiko penusah ngenyit.
Nya nyerangkung ari sukut kapasiti pengereja pengawa, negapka institusyen, ngemesaika chara mitigasyen enggau aplikasyen teknologi.
“Aku udah dipadahka Tuai Direktor Nadma senentang siti ari pengawa ke udah dipejalaika Nadma dikena meri pemereti ati ngagai mensia mayuh bekaul sekeda risiko penusah ngenyit ke bisi di Malaysia iya nya nengah chara mandangka dokumen Daftar Risiko Kebangsaan (NRR) ungkup mensia mayuh,” ku iya madah.
Iya mansutka jaku nya lebuh ngelancharka webinar Risiko Bencana di Era Ubah Gaya hari ke diatur Nadma, sehari tu.
Dokumen nya disediaka nengah kerejasama kaban strategik Nadma, Palan Pansik Penusah Ngenyit Asia Tenggara, Universiti Kebangsaan Malaysia (SEADPRI-UKM) ti deka dilancharka Menteri Besai maya hari empat minggu baru.
