SRI AMAN: Menteri Muda Pengelantang Komuniti, Datuk Francis Harden Hollis bisi datai ngabas pemansang taba Projek Transformasyen Menua Pesisir (RTP) di sitak Kunsil Nengeri Simanggang empai lama.
Projek rayat tu nyengkaum ngemanahka jalai Sungai Reboh/Kampung Paku ili ti sepenyauh 3.8 km ti diisi jalai bebatu ungkup fasa keterubah nengah ungkus sepenyampau RM 450,000.
“Kitai datai ngabas dikena nentuka projek tembu penug ngambika perengkaguna nya ulih diguna peranak kandang menua nya bejalaika aktiviti betanam kena nyungkak sosio-ekonomi dalam ngangkatka tikas pengidup raya di menua pesisir,” ku iya dalam siti penerang.
Harden ke mega Kaban Kunsil Nengeri (ADUN) Simanggang madah, sebengkah agi projek ke diabas iya nya projek ngaga baru jalai enggau jematan di Rh Rangga Angkom, Sg Tenggak B.
Ku iya madah, projek tu begunaka ungkus belanja sepenyampau RM350, 000 ke pengelantang peranak kandang menua nya.
Kelimpah ari nya, projek tu mega sebagi ari sekeda projek ti dipelanja penuh perintah Gabungan Parti Sarawak (GPS) ba baruh iring Kepala Menteri, Datuk Patinggi Abang Johari Tun Openg.
Berebak enggau nya, Harden naka ulih nentuka projek rayat bejalai enggau lanchar sereta nitihka spesifikasi ti udah ditetapka.
