SIBU: Menteri Muda Pengerai Mensia Mayuh enggau Pengawa Berumah Sarawak, Dr Annuar Rapaee madahka sekeda ari Sepital Medan di Sibu ti digaga Raban Soldadu Malaysia (ATM) udah ulih diguna.
Nitihka penerang ba dalam laman facebook iya, iya madah sekeda endur ke bukai deka berengkah dibuka pengudah tembu disikap enggau semua perengka logistik nyengkaum barang perubat.
Dr Annuar ke mega Koordinator Komiti Mutarka Penusah Ngenyit Bagi Menua (JPBB) Sibu madahka endur nya ila deka diguna nyadi ‘holding bay.”
Berebak enggau nya, Komiti Mutarka Penusah Ngenyit Nengeri (JPBN) Sarawak deka ngaga 100 iti kati wad sementara berengkah ba minggu baru.
Dulu ari tu, raban Soldadu Langit Diraja Malaysia udah nganjung bemacham perengkaguna enggau barang perubat nguna bilun A4000M ke Sepital Medan ATM Sibu ti dijangka beoperasyen enda lama agi.
Penumbuh Sepital Medan ti kedua di Sarawak tu pengudah di Kapit ke tuju dikena mantu sepital Sibu nguruska pesakit ukai Covid-19 seraya ngelempungka tating pengereja pengawa pengerai.
Ends.//
