KUCHING: Rayat Sarawak ari nengeri bukai ti udah nembuka dua dos vaksin enda ibuh agi ngisi ‘EnterSarawak’ enggau peresa Covid-19 tama ke Sarawak berengkah 18 Oktober tu.
Taja pia, Komiti Mutarka Penusah Ngenyit Nengeri (JPBN) Sarawak madah, sida tetap dipinta ngisi e-Health Declaration Form (eHDF), mantaika status ‘nembuka dos vaksin’ enggau status ‘kurang risiko’ tauka kontak semak ti nadai kelai’ aja ba MySejahtera.
JPBN dalam penerang mega madah, mysejahtera deka diperesa sebedau sida dikemendarka tama bilun di ICQS
Taja pia, sida ti bedau nembuka dua dos vaksin mesti ngisi ‘EnterSarawak, ngisi pom eHDF enggau ngambi peresa Covid-19 tiga hari sebedau tama ke Sarawak.
“Mesti ngambi peresa rT-PCR tauka RT Antigen (Swab) dalam timpuh 3 hari sebedau tama ke Sarawak (pemutus peresa self-test kit enda diterima),” ku dalam penerang nya.
Tu nyengkaum ngembuan status ‘Enda Berisiko’ enggau ‘Kontak Semak Nadai Kelai’ aja ba MySejahtera.
Kelimpah ari nya Sida mega mesti bejalaika kuarantin di rumah tauka palan kuarantin pengelama 10 hari .
JPBN madah, nembiak baruh umur 12 taun mesti peresa Covid-19 enti deka tama ke Sarawak begulai enggau apai indai ti bedau nembuka dua dos vaksin.
Ba awak ke sama, sida ti pulai ari menua luar mesti ngisi EnterSarawak, pom eHDF, RT-PCR dalam timpuh 3 hari sebedau tama ke Malaysia, status udah nembuka vaksin, kuarantin 7 hari enggau kuarantin 10 hari ngagai sida ti bedau vaksin penuh sereta mesti ngeripotka sejarah pejalai diri.
Ku JPBN nerang agi, nyema sida enda ngeripotka pejalai diri deka ditinggang ukum undang-undang.
Nangkanka nya, semua peranak menua luar enggau ukai rayat Sarawak mesti ngisi EnterSarawak sebedau tama ke Sarawak.
