MUKAH, 17 Oktober: Peranak di Bagi Menua Mukah dilalau ngambika ngasika Standard Atur Pengawa (SOP) ke udah ditetapka perintah ba genturung pendiau tauka rumah panjai.
Ku Pemangku Pegawai Pelilih Mukah Peleadzman Ahip madah, diatu menua benung ngalih ngagai renggat endemik iya nya rayat idup begulai enggau virus COVID-19 lebuh bejalaika pengawa ninting hari.
“Aku minta kitai sama ngemeranka SOP ke udah ditetapka dikena nagang sereta nyeliahka pengekai igi penyakit tu nyadi ba genturung pendiau kitai.
“Tebal agi, ruang bilik ti bisi orang ke lunggar umur enggau anak mit ti mesti dijaga kitai ari dirampit igi penyakit tu,” ku iya madah lebuh ba Program Nyerahka Chek MRP ari Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai ba Rh Ato, Bukit Dinding, Jalai Selangau/Mukah maya Hari Enam.
Iya madahka, mayuh genturung pendiau benung bejalaika Atur Nagang Pemindah Diteritka (PKPD) ketegal bisi ngerikodka kes COVID-19.
“Baka ke ditemu kitai mayuh kandang endur benung bejalaika PKPD di Bukit Dinding enggau Jalai Bukut / Sungai Duan. Nya kebuah kitai mesti seruran bejejaga,” ku iya.
Lebuh nerangka senentang program betuchuk vaksin COVID-19 di pelilih Mukah, iya madahka 98 peratus rayat besai tuai udah nerima dua dos vaksin lalu naka hari enam (kemari) raban nembiak ke beumur 12 nyentuk ke 15 taun nerima dos kedua seraya nembiak ke beumur 16 nyentuk ke 17 taun udah nerima kedua-dua dos vaksin nya.
“Nengeri Sarawak nyadi nengeri ti keterubah meri vaksin ketiga ngagai raban orang ke lunggar umur sereta bisi komorbid.
“Naka ke diatu, program meri tuchuk vaksin ketiga ngagai raban tu udah berengkah dipejalaika di pelilih Mukah,” ku Peleadzman madah agi.
