SRI AMAN : Kaban Kunsil Nengeri (ADUN) Simanggang, Datuk Francis Harden Hollis, ngabas projek ngemanahka Jalai Komuniti sepemanjai 800 meter ba Kampung Tekalong/Siga, Jalai Paip, Sri Aman, kemari (Hari Enam).
ADUN Simanggang nya madah, projek ngemanahka jalai nya ngena agih belanja RM200,000 ti diungkup ba baruh Projek Transformasyen Menua Pesisir (RTP).
“Projek RTP tu sebagi ari sekeda projek ti udah digaga ba sitak DUN Simanggang, lalu kitai seruran enggau naka ulih meri servis ti manah ngambika ngelantang rayat,” ku iya dalam siti penerang.
Harden, ke mega Menteri Muda Pengelantang Komuniti, madahka projek tu digaga kena nangkup peminta peranak genturung pendiau ngambika ngemudah pengawa sida ninting hari, lebih agi ba pengawa ngintu pemati.
Penembu jalai nya ila deka ngemuntangka aktiviti betanam seraya ngangkatka tikas pengidup peranak kandang menua nya.
Nya kebuah Harden komited nentuka projek rayat bejalai enggau mujur sereta nitihka spesifikasi ti udah ditetapka perintah. – TVS
