KUALA LUMPUR, 16 Oktober: Tetiap iku temuai ari menua luar enggau kontak semak ti benung bejalaika kuarantin ba hari kelima ke atas sereta udah nerima dua dos vaksin COVID-19 deka bejalaika peresa Tindak Balas Berantai Polimerase Masa Nyata (RT-PCR) ba pun sehari tu.
Menteri Pengerai Khairy Jamaluddin madahka, sida ke enda ngambi vaksin tauka bedau nerima dua dos COVID-19 enggau benung bejalaika kuarantin ba hari kelapan ke atas mega ulih bejalaika peresa RT-PCR.
“Enti sema pemutus peresa pengawa nyidi COVID-19 sesiku orang nya ngayanka negatif, sida dilepaska ari perintah dikemata enggau dipatau berengkah hari satu tu,” ku iya madah nengah siti penerang ti dikeluarka maya Hari Enam.
Maya hari lima, Menteri Besai Datuk Seri Ismail Sabri Yaakob madahka senentang Timpuh Kuarantin Temuai ari menua luar enggau Perintah Dipatau enggau Dikemataka ungkup Kontak Semak dikurangka ba pun 18 Oktober tu.
Berindik ari nya, sesiku orang ke udah nerima dua dos vaksin COVID-19 deka bejalaika timpuh kuarantin sepengelama tujuh hari, seraya sida ke nadai tauka bedau nerima dua dos vaksin COVID-19 mesti bejalaika timpuh kuarantin sepengelama 10 hari.
Kelimpah ari nya, Khairy nerangka senentang entara sida ke bekaul enggau timpuh kuarantin ke dikurangka ba pun ari satu tu iya nya peranak menua tu, pemastautin tetap Malaysia, ekspatriat tauka kor diplomatik tauka peranak menua luar t dikemendarka Tuai Direktor Imigresen tama ke Malaysia ari menua luar.
Sida bukai ke bekaul iya nya kontak semak ngagai kes positif COVID-19 enggau sesiku orang ke diberi perintah tauka gerah dipatau enggau dikemataka pegawai ti diberi kuasa.
“Ambika chunto, sida ke pulai ari menua ke mandangka tikas risiko tinggi endur pengekai igi penyakit COVID-19 baka ke dipadahka perintah,” ku iya madah agi.
Ku Khairy madah agi, garis lalau ke udah ditetapka agi diteritka perintah lalu mensia mayuh ditangkan terus ngasika SOP nya.
“Sesiku orang ke enda ngasika Perintah tauka Gerah Dipatau enggau Dikemataka nya siti ari penyalah ba baruh Akta Nyeliah enggau Nagang Penyakit Berampit 1988,” ku iya madah agi.
