KUCHING, 16 Okt : Bisi tiga iku nembiak mit entara 12 iku Peranak Menua Luar Nadai Pemendar (PATI) ari menua Indonesia diburu pulai sepengudah nguji tama belalai ke Sarawak nengah jalai chit di Tebedu, tumu pagi kena 16 Oktober 2021.
Ku Jurujaku Sel Perhubungan Raya Markas 1 Divisyen madah, lebuh tim soldadu benung bejalaika operasyen ngerap sida tetemuka semua PATI nya benung bejalai kaki nguji tama belalai urung pukul 5.30 pagi.
“Pengudah ditan enggau ditasat, bisi lima iku lelaki ke beumur 35 nyentuk ke 45 taun, empat iku indu ke beumur 34 nyentuk ke 39 taun sereta tiga iku nembiak mit ke beumur 4 nyentuk ke 14 taun,”
“Mayuh macham chara PATI deka tama enggau nadai pemendar ke Malaysia ti nyengkaum nguji tama belalai tang mujur dipuntanka,” ku iya nambah agi.
Sida nadai ngembuan sebarang dokumen pejalai ke sah ti nguji deka ke Malaysia laban deka ngiga kereja.
Kesemua PATI nya diburu pulai enggau ripot polis udah digaga dikena bejalaika atur ti patut.
Ku Jurujaku nya madah, pandemik COVID-19 meri empas ngagai PATI laban nadai gawa lalu sida begigaka kereja di Sarawak.
Berebak enggau nya,raban soldadu Sarawak deka chakah agi nyaga pengelikun garis entara menua enggau kerejasama ejensi penerit adat dikena nagang aktiviti PATI enggau kes pengawa jai.
