KUCHING, 16 Oktober: Komiti Mutarka Penusah Ngenyit Nengeri (JPBN) Sarawak udah ngaga pemutus senentang sesiku orang ke udah nerima dua dos vaksin COVID-19 (ari nengeri bukai ba dalam Malaysia) ti deka tama ke Sarawak enda ibuh minta nengah EnterSarawak berengkah 18 Oktober 2021.
Taja pan pia, sida mesti ngisi e-Health Declaration Form (eHDF) enggau enda dipinta bejalaika peresa COVID-19 sebedau tama ke Sarawak.
“Sesiku orang nya mesti bisi eviden status udah nerima dua dos vaksin, mesti mandangka status kurang risiko tauka ‘Kontak Kasual Nadai Kelai’ aja ba dalam aplikasyen MySejahtera.
“MySejahtera deka diperesa sebedau sesiku orang dikemendarka nepan bilun tauka bot pasinjir tauka ba ICQS,” ku JPBN Sarawak madah ba dalam siti penerang maya Hari Enam.
Nangkan ke nya, ungkup sesiku orang ke nadai tauka bedau nerima dua dos vaksin COVID-19 ke deka tama ke Sarawak mesti minta pemendar nengah EnterSarawak.
Sida mesti ngisi e-Health Declaration Form (eHDF) enggau enda dipinta bejalaika peresa COVID-19 sebedau tama ke Sarawak.
“Mesti bejalaika peresa rt-PCR tauka RTK Antigen (Swab) dalam timpuh tiga hari sebedau tama ke Sarawak.
“Pemutus peresa self-test kit enda diterima, mesti mandangka status kurang risiko tauka Kontak Kasual Nadai Kelai’ aja ba dalam aplikasyen MySejahtera.
“MySejahtera enggau EnterSarawak deka diperesa sebedau sesiku orang dikemendarka nepan bilun tauka bot pasinjir tauka ba ICQS, bejalaika kuarantin ba rumah tauka ba stesyen kuarantin sepengelama 10 hari (bepanggai ba tikas risiko ti dipatau Pegawai Pengerai),” ku iya madah agi.
Kelimpah ari nya, anak mit ba baruh umur 12 taun mesti bejalaika peresa COVID-19 enti sema tama ke Sarawak begulai enggau apai indai tauka pengibun ke nadai tauka bedau nerima dua dos vaksin.
