LIMBANG, 16 Oktober: Gerempung Raban Nembiak Bansa Sarawak (SABERKAS) pampang Batu Danau bejalaika program nyerahka bantu pemakai ngagai peranak di Rh. Lana Kampung Sepangah ke diatu benung bejalaika Atur Nagang Pemindah Diteritka (PKPD) ba pun ari 11 Oktober nyentuk ke 17 Oktober 2021.
Ngambi penerang ari UKAS, Kaban Kunsil Nengeri (ADUN) Batu Danau Paulus Palu Gumbang madahka, bisi 47 tuai bilik ari rumah panjai nya nerima bantu pemakai ari SABERKAS.
“47 bungkus pemakai ti nyengkaum manuk, sosej, telu, sayur kubis enggau entekai diserahka ngagai 47 tuai bilik ke diau ba rumah panjai nya, “ ku iya madah lebuh nurun nyerahka bantu pemakai ngagai Rh. Lana maya Hari Lima.
Paulus ke mega Chairman SABERKAS pampang Batu Danau madahka, bantu pemakai nya diserahka ngagai raban polis ke nyaga ba palan jaga PKPD Kampung Sepangah.
Iya arapka bantu pemakai nya ulih mantu ngelempungka tating belanja peranak ke diau ba genturung pendiau nya ke diatu enda ulih mindah ketegal benung bejalaika PKPD ti dilanjarka sepengelama tujuh hari.
“Pengawa tu endang nyadi sebagi ari tanggungpengawa sosial korporat (CSR) SABERKAS ti seriran enggau moto SABERKAS iya nya “Berbakti” ngagai peranak enggau raban ke begunaka bantu,” ku iya madah.
Kelimpah ari nya, Paulus madahka, SABERKAS iya nya siti pelantar ke ulih meransang raban nembiak ba sitak nya begempung nulung orang bukai ke napi penusah.
Nangkan ke nya, Tuai Rumah Lana ke mega Chairman SABERKAS Unit Kpg Sepangah beterima kasih ngagai sida ke udah meri perati sereta nyerahka bantu pemakai nya.
