KUCHING: Sarawak ngerikodka 1,061 kes baru Covid-19 naka Hari Empat ti nyadika penyampau semua kes ba nengeri tu manggai 228, 736 kes.
Komiti Mutarka Penusah Ngenyit Negeri (JPBN) Sarawak ba dalam siti penerang madahka, Kuching terus ngerikodka kes pemadu tinggi iya nya 278 kes, ditangkanka Miri (235), enggau Sibu (155).
Berebak ari nya, Sarawak kena Hari Empat mega ngerikodka 23 kes pemati ketegal Covid-19 ba pun ari 1 Oktober nyentuk 13 Oktober 2021 ti ngaul pesakit ke bisi rikod sakit raya baka kemi manis, tinggi darah, penyakit tungkul sengayuh, jantung (tungkul ati), obesiti enggau strok.
Nangkan ke nya, JPBN Sarawak madahka bisi tiga kluster udah punas iya nya Kluster Sega, Bau, Kluster Andi Liam, Beluru enggau Kluster Sebobok, Bau pengudah nadai ngerikodka penambah kes baru Covid-19 dalam timpuh 28 hari.
Penyampau semua kluster ke agi aktif tauka bedau punas di Sarawak iya nya 63 kluster.
Bisi 10 genturung pendiau udah diketuka Atur Nagang Pemindah Diteritka (PKPD) ke ngaul Rh. Laja, Sebu Tengah, Tanjung Bijat, Sri Aman, Rh. Pindi Empelam, Engkilili, Lubok Antu, Rh Jubang, Sebangki Panjai, Lubok Antu, Rh Kedit, Raba Tiput, Betong, Rh Bunsu, Tansang, Betong, Rh. Trisy, Nanga Selaut, Julau, Rh. Lembang, Ulu Dayu, Pakan , Rh Enjop/Rh Ragai, Rantau Jerenang, Pakan, Rh Henry Chindang, Sg Mador, Bintangor, Meradong enggau Rh James Brandah, Muara Bunut, Bintangor, Meradong.
Semua genturung pendiau tu diketuka PKPD seretai berengkah 14 Oktober 2021.