KUCHING: Orang dagang ke beumur 18 taun ke atas diperansang ngambi peluang ngaul diri dalam Program Sarawak Shell LiveWIRE ti deka diatur dalam tali arus kena 6 November nyentuk 5 Disember 2021.
Menteri Muda Perambu Mengeri, Pengatur Tanah enggau Pengeraja Asal, Datuk Len Talif Salleh madah, program tu pelasar dikena mantu orang dagang Sarawak ngerembaika dagang sida.
“Pesereta ti dipilih nyereta program tu ila enggau dalam siri woksyop tauka ‘bootcamp’ chara virtual lalu deka diterangka pemansang nyadi orang dagang,” ku iya dalam siti penerang.
Iya ke mega Chairman TEGAS madah, tuju program nya dikena mantu tauka meri penemu chara bedagang, nguji model dagang sereta nyikap sida nyadi orang dagang ti ulih ngerembaika penemu dagang ngagai tikas ke tinggi.
Program tu mega meri inspirasyen ngagai serikat ti deka berengkah muka dagang dalam inovasi produk dikena nangkup guna sosio-ekonomi kemaya hari tu.
Ku iya madah, lima pemenang ti dipilih ba kepenudi program nerima geran penyampau RM15,000 ari shell enggau TEGAS.
Berebak enggau nya, iya ngarap kerejasama strategik entara TEGAS enggau Shell nengah TEGAS Digital Village sereta TEGAS Digital HUB ulih nyungkak penatai pemisi serikat pengepun enggau dagang rama ke manah, seriris enggau Strategi Ekonomi Digital Sarawak 2018-2022.
