KUCHING:Perintah Sarawak meri bantu tambah ngagai Industri Mit Enggau Jelan Pemesai (IKS) sereta pedagang mikro ba baruh Bantu Khas Sarawakku Sayang (BKSS) 7.0 plus.
Kepala Menteri, Datuk Patinggi Abang Johari Tun Openg madah, bantu keterubah iya nya bantu duit khas sekali bayar RM10,000 ngagai IKS enggau bantu RM3,000 sekali bayar ngagai pedagang mikro Sarawak ti berejister enggau gerempung pengelikun rama (PERKESO) .
Kedua-dua bantu tambah tu dijangka mai ungkus penyampau RM78.5 juta ngagai perintah Sarawak.
Ku iya madah, bantu tu deka meri pemaik ngagai 470 entiti pedagang aktif enggau ungkus belanja ditanggung perintah nengeri Sarawak sepenyampau RM4.7 juta.
“Perintah Sarawak mega nyendiaka bantu duit khas sekali bayar RM3,000 ngagai pedagang mikro di Sarawak ti berejister enggau PERKESO naka 31 Mac 2021,” ku iya maya pengerami kelai nyuaka bantu BKSS 7.0 Plus ngagai IKS di Wisma Bapa Malaysia sehari tu tadi.
Berebak enggau nya, sida dipinta nyendiaka dokumen sukung ke bekaul nengah portal dalam tali arus Sarawak ba ujung bulan Oktober tu.
Ku iya madah, bantu duit tu deka dibayar kena bulan Disember enggau dijangka meri pemaik ngagai 24,600 iku pedagang mikro ti begunaka ungkus belanja manggai RM73.8 juta.
Nya alai, iya ngarap bantu nya ulih ngelempungka tating penusah komuniti pedagang di Sarawak ngambika sida terus mansang ke mua ba fasa pandemik tu.
