KUCHING, 13 Oktober: Opis Pengerai Nengeri Sarawak deka berengkah meri dos ketiga enggau dos penyungkak vaksin COVID-19 ngagai semua peranak di Sarawak kena ke 13 Oktober 2021.
Ku Sapit Direktor Pengerai Nengeri (Pengerai Mensia Mayuh) Sarawak, Dr Rosemawati Binti Ariffin madah pengawa meri dos ketiga tauka dos penyungkak tu ukai ketegal vaksin ke udah diberi sebedau tu enda ngasi tang tu sebagi ari chara dikena nambahka agi pengelikun ngagai raban rentan.
Pekara tu nyerangkung raban ke bisi penanggul ba sistem imun iya nya enda chukup dua dos dikena nyaga pengelikun tubuh sida lebuh ngelaban COVID-19.
Nangkanka nya ku iya madah agi, bepelasarka Polisi Opis Menteri Pengerai Malaysia bekaul enggau dos ketiga sereta dos penyungkak tu nyerangkung vaksin Pfizer COVID-19 udah dikemendarka nyadi dos penyungkak.
Naka ke diatu, pemendar udah diberi ungkup vaksin ke ngembuan fungsyen ke sama enggau vaksin ke diberi sebedau tu ngagai sesiku orang tauka ‘Vaksinasi Homolog’.
“Dos ketiga deka diberi pemadu kurang 28 hari sepengudah sesiku orang nerima dos kedua vaksin COVID-19 lalu dos penyungkak deka diberi pemadu kurang enam bulan sepengudah nerima dos kedua.
“Raban ke deka diberi perati ungkup pengawa meri dos ketiga iya nya raban ke bisi penanggul ba sistem imun ketegal penyakit tauka benung berubat ti dipelabaka bisi 11,900 iku orang.
“Pia mega, ungkup dos penyungkak, raban orang lunggar umur ke berumur lebih 60 taun ti dipelabaka bisi 80,300 iku enggau raban gawa di luan 30,340 iku deka diberi perati awakka nerima dos penyungkak tu,” ku iya madah ba siti penerang sehari tu.
Dos ketiga enggau dos penyungkak tu ulih diterima ba klinik perintah , sepital enggau klinik peribit.
Ungkup sida ke ulih nerima nya tau betelefon ngagai klinik ke semak ngambi netapka hari bulan nerima tuchuk vaksin nya.
Rintai nama klinik ke ulih endur nerima tuchuk tu deka dipadahka baru nengah pelasar media rama ke bisi.
Bepelasarka rikod, dos ketiga tu diberi sebagi ari dos dikena nambahka pengasi vaksin tebal agi sida ke ngembuan penanggul sistem imun ba ti renggat keterubah nerima vaksin ngena chara beturut (primary vaccine series).D
Dos penyungkak tu diberi ngagai sida ke ngembuan sistem imun ke meri timbal ke chukup lebuh nerima vaksin ngena chara beturut, tang udah nya makin lama makin kurang.
