KUCHING, 13 Oktober: Bisi 14 iku peranak menua luar tama nadai pemendar (PATI) nguji tama ke Sarawak nengah jalai chit udah diburu pulai Raban Divisyen Pertama Infantri Malaysia.
Nitihka penerang ke dikeluarka Markas Divisyen Pertama Infantri Malaysia (1 Div), penyampau sida ke diburu pulai tu iya nya dalam timpuh dua hari operasyen dipejalaika ba Tebedu enggau Biawak, Lundu.
Pengawa muru ti keterubah kena ke 12 Oktober 2021 iya nya maya hari dua urung pukul 10.05 pagi ti ngaul dua iku lelaki berumur 39 enggau 42 taun ti nguji tama ari tunga Indonesia ke Tebedu.
Ba hari ke sama mega, raban penerit atur mujur nangkap 7 iku lelaki berumur 19 nyentuk ke 52 taun ti dipechaya nguji tama ngagai Biawak urung pukul 5.00 lemai.
Nangkanka nya, raban penerit atur mega mujur nangkap lima iku PATI ti berumur 24 nyentuk ke 47 taun nyengkaum siku indu kena ke 13 Oktober 2021 urung pukul 11.00 pagi ba kandang pelilih Biawak, Lundu.
Semua sida tu ditemu nadai mai dokumen ke sah sereta dipechaya tama ngena jalai ke enda dikemendarka tauka jalai chit.
Asil tasat tetemuka sida tu nguji tama ke Sarawak ketegal deka ngiga pengawa ba mayuh bengkah sektor di Sarawak.
Ba penerang nya mega madahka, kes ngaul PATI nguji tama belalai majak nambah tebal agi lebuh pengekai igi penyakit COVID-19 tu.
Nya kebuah, raban soldadu diatu deka terus mekuhka pengawa matau garis entara menua.
