KUCHING, Okt 12 : Siku lelaki ke beumur 53 taun ditinggang ukum sepenyampau RM1,500 sereta dijil sebulan ari Kort Majistret, Kuching kena 11 Oktober 2021 ketegal ngerusakka sebuah mutosikal ti diempu anak buah iya nguna parang.
Kus pengerugi ti ditapi iya, iya nya RM200.
Lelaki nya ngaku penyalah iya sepengudah penyalah iya dibaca betunga mua enggau Luyar Syarifah Fatimah Azura Wan Ali.
Iya didawa ngaga penyalah nya ba sebuah kedai runchit di Kampung Bra’ang Jalai Puncak Borneo, Padawan lebuh iya mabuk.
Entudika nya, iya didawa ba baruh Seksyen 427 Kanun Keseksaan.
Bepelasarka Seksyen nya ukum jil lebih kurang setaun enggau enda ngelui ari lima taun tauka denda tauka kedua-dua nya sekali enti ditemu salah.
Ke rikod, urung pukul 1.30 ngalih hari kena 27 hari bulan Tiga ti udah, lelaki nya enda mukai-mukai datai mai ilang lalu mantap begian depan mutosikal ti diempu Rodza Jerim ke benung meli minyak ba kedai runchit nya.
Kes nya dipejalaika Pegawai Dawa Inspektor Mohd Adzmei Ahmad sereta lelaki nya nadai diarika luyar ba kort.
