BINTANGOR, 12 Okt : Lapan iku lelaki ditan polis dalam seiti pengawa ngerap ketegal nyabung manuk ba kandang endur sebengkah rumah panjai di Jalai Tanjung Manis maya Hari Minggu tu tadi.
Tuai Polis Pelilih Meradong, DSP Sekam Anoi, madah sida ke ditan nya beumur entara 33 nyentuk 63 taun taja pan sida nguji deka ngelarika diri sepengudah polis datai ba endur nya.
Polis ngerampas tiga iti taji manuk, seiti unit penimbang, dua keping papan kena bejudi, empat bangkai manuk enggau seiku manuk ti agi idup, ku Sekam madah dalam siti penerang seharitu.
Kes nya ditasat ba baruh Seksyen 3 (1) Nagang Ngemediska Jelu (Sabung Manuk) Undang-Undang 1962.
Ku Sekam agi, kesemua lelaki nya dikompaun RM1,500 siku nitihka Atur 7 (1) Atur Nyeliah enggau Nagang Penyakit Berampit (Tusun Atur Dalam Kandang Endur Berampit 2020) (PPN) 2021.
“Kami deka ngingatka mensia mayuh, polis enda meri peluang ngagai sida ke bisi ngereja pengawa nyabung manuk.
“Kami mega seruran bejalaika operasi dikena nentuka undang-undang ba baruh Pelin Mulaika Pemanah Menua (PPN) meruan dititih enggau terit kena nagang igi penyakit COVID-19,” ku iya. – TVS
