PUTRAJAYA, Okt 12 : Sepenyampau 4,471 kes anak mit ke beumur 18 taun ke baruh diripotka lenyau kenyau ari taun 2017 nyentuk ke 1 September taun tu.
Ku Sapit Menteri dalam Nengeri Datuk Seri Ismail Mohamed Said madah bepelasarka statistik Polis Diraja Malaysia (PDRM), ari penyampau nya, 4,399 iku anak mit udah ditemu lalu 72 iku agi lenyau.
Ke rikod, kes orang lenyau ke beumur 18 taun ke atas bisi 6,087 kes diripotka ba timpuh ti sama enggau 4,871 iku udah ditemu lalu 1,203 iku agi diripotka lenyau.
Ku iya nambah, entara pengawa perintah ke deka mutarka isu tu iya nya numbuhka siti portal anak mit ke lenyau ti ngembuan sebarang informasyen dibantaika nengah portal nya lalu ulih dipeda mensia mayuh.
“Portal nya meri peluang ngagai komuniti bekerejasama dalam begigaka anak mit ke lenyau enggau lebih lengkas sereta efisien bagi nyadung sebarang informasyen ke pemadu baru nengah internet,” ku iya madah.
PDRM mega benung bekerejasama enggau 40 buah ejensi ke bukai nengah Nur Alert iya nya siti sistem dalam nyidi kes anak mit ke lenyau dikena mantu ejensi penerit adat undang-undang bejalaika pengawa tasat enggau nangkap enggau lengkas.
Entara kebuah anak mit tau lenyau iya nya bisi ngembuan penanggul sida sebilik tauka nadai bulih sebarang tati ari ruang bilik sida iya empu, pansut enggau kaban belayan enggau pangan, mawa, sakit untak sereta bisi kaul enggau kes pengawa jai.
Kelimpah ari nya, anak mit ke lenyau ti nyengkaum ari sida ke deka ngiga gawa, belaya enggau ruang bilik sida, lari ari pengutip hutang sereta kes ngemediska anak mit chara fizikal tauka mental.
