KUCHING, Okt 11: Sepenyampau 210,600 dos vaksin COVID-19 bansa Pfizer-BioNtech udah datai ari menua Belgium kena 10 Oktober 2021.
Pia ku Penyanding Penemu Komiti Mutarka Penusah Ngenyit Nengeri (JPBNS) Sarawak Datuk Sri Dr Sim Kui Hian.
Ku Dr. Sim madah nengah Facebook iya, vaksin tu ungkup dos penambah ba Program Betuchuk Vaksin COVID-19 Menua (PICK) di Sarawak.
“Sepenyampau 210,600 dos penambah vaksin COVID-19 udah datai ba Padang Bilun Antarabansa Kuching (KIA) ari menua Belgium lemai tu (kemari),” ku iya madah nengah status Facebook iya.
Dr. Sim ke mega Menteri Kaunsil Kandang Menua Enggau Pengawa Berumah madahka Sarawak iya nya nengeri keterubah bejalaika pengawa betuchuk vaksin COVID-19 dos penambah di menua tu ari Menteri Pengerai Malaysia, Khairy Jamaluddin enggau Raban Pengereja Pengawa Khas Imunisasyen COVID-19 (CITF).
Ke rikod, kena hari Lima minggu nyin tadi, Unit Regulatori Farmasi Menua (NPRA) ba baruh Opis Menteri Pengerai (KKM) udah ngenemdarka bansa Pfizer-BioNtech COVID-19 vaksin kena dos penambah aja.
Taja pia, dos penambah tu diberi ngagai orang ke udah nembuka dua dos vaksin sepemanjai enam bulan ti udah.
Dr. Sim madahka naka ke diatu, nadai polisi senentang vaksin ke bukai ti tau nyadi dos penambah tauka timpuh udah nembuka dua dos vaksin.
Ku iya nambah agi, kena nengeri Sarawak, Raban Penyanding Penemu Vaksin COVID-19 Sarawak (SCOVAG) udah merambuka urung 340,000 iku individu ba baruh kategori 1 iya nya ti ngembuan risiko tinggi kena rampit igi penyakit COVID-19, orang lunggar umur enggau raban gawa di luan nerima dos penambah.
Individu tu deka nerima dos penambah berengkah ari bulan tu enggau bulan baru ila.
