BETONG: Sepenyampau RM60 juta diungkupka perintah nengeri ngagai pekebun lada enggau sawit.
Sapit Kepala Menteri , Datuk Amar Douglas Uggah Embas madah, duit turu nya deka diguna dikena mekalka baja ngagai raban pekebun.
“Perintah GPS nengeri deka ngambi berat penanggul ditapi kita enggau ba awak ke sama polisi perintah iya nya mantu pekebun ngulih penatai pemisi ari pengawa sida,” ku iya maya ngatur aum begulai enggau 40 iku tuai rumah enggau pekebun ba sitak Bukit Saban, kemari.
Iya ke mega Menteri Betanam Betupi Moden, Tanah Adat Enggau Pemansang Kandang Menua madah, pengekai igi penyakit covid-19 udah ngujungka pengawa betanam betupi perintah ditetanggul.
Bagi menua Betong bisi potensi ulih dikemansangka bepelasarka ba pemesai tanah, kualiti tanah ti manah enggau gaya pemendar raban pekebun.
Kelimpah ari nya, Palan Ngumpul, Proses Enggau Mungkus (CPPC) deka ditumbuhka di betong ti ngena konsep baka CPPC tarat di pelilih Serian.
Perintah mega merambu deka ngaga sebuah agropark di Betong seriris enggau juluk deka ngemeranka betanam betupi moden fertigasyen enggau hidroponik ngagai komuniti.
“Kitai mega deka ngemansangka STOLPORT (padang bilun mit) di Spaoh dikena mantu bedagangka produk ke menua luar enggau terminal pemakai ti deka nyadi sebagi ari padang bilun tu,”ku iya.
