MIRI, 11 Okt : Polis mujur ngetan siku lelaki peranak kandang menua tu ketegal enchuri kerita nyengkaum mutosikal di pelilih Miri kena 10 Oktober 2021.
Ku Tuai Polis Pelilih Miri ACP Hakemal Hawari madah, asil pansik tumu tetemuka saspek ke beumur 21 taun nya kala enchuri sebuah perodua kancil kena 28 September taun siti nyin tadi ba lot genturung pendiau di Jalai Miri-Bintulu.
Berindik ari ripot mensia mayuh, saspek mujur ditan seraban tim ari Begian Tasat Pengawa Jai (BSJD), Indu Opis Pelilih (IPD) Miri ba hari ke sama urung pukul 2.50 lemai di Jalai Miri Bypass.
“Taja pia, saspek disahka positif COVID-19 kena 6 Oktober lalu dibai ngagai palan kuarantin ari Opis Menteri Pengerai (KKM) ba hari ti sama,”
“Maya iya deka ngelarika diri, saspek lalu enchuri sebuah Van Toyota Hiace Window 2.5 ti diempu sebuah gerija di Tudan,”
“Van nya ditemu ba endur Jalai Bintulu-Miri urung pukul 9.40 malam kena 8 Oktober,” ku iya madah agi.
Ku iya nambah agi, saspek disahka positif COVID-19 lalu deka ngelarika diri ari palan kuarantin tumu pagi kena 7 Hari Bulan Sepuluh 2021.
Maya iya deka ngelarika diri, saspek lalu enchuri sebuah Van Toyota Hiace Window 2.5 ti diempu sebuah gerija di Tudan.
Hakemal madahka, saspek ninggalka van nya ketegal digagai mensia mayuh sepengudah van nya diripotka lenyau.
“Sepengudahnya, saspek enchuri sebuah Proton Iswara kena 9 Oktober di Kampung Sungai Dalam, Jalai Bintulu-Miri lalu ninggalka entukar nya ba endur babas ti besemak enggau Batu Niah,”
“Sebuah mutosikal ti empu siku sekuriti mega dichuri saspek sepengudah iya ninggalka Proton Iswara,”
Iya madahka, BSJD Miri mujur ngetan saspek tumu pagi kena 10 hari bulan Sepuluh sepengudah
nerima informasyen ari mensia mayuh senentang pejalai saspek.
Iya muji kerejasama ari mensia mayuh laban udah mayuh nulung sida ngetan saspek.
Berebak enggau nya, IPD Miri deka ngelalau mensia mayuh seruran bejejaga enggau terus ngeripotka informasyen senentang aktiviti pengawa jai ngagai polis dikena bejalaika atur ti patut.
