MIRI, 11 Okt : Bisi siku orang lunggar umur bebadi nyawa sepengudah entukar pacuan empat roda ke dibai iya tepawah di Jalai Kelingi Park nuju ke Piasau kena hari satu.
Tudah ke benama Tan Ah Siang, 63 taun asal ari Lorong 3, Krokop, Miri, disahka parai ba endur penusah nya.
Ku Tuai Opis Tasat Enggau Penerit Atur Trafik Sarawak, Superintenden Alexson Naga Chabu madah penusah nya nyadi urung pukul 9.30 pagi enggau nadai ngaul kerita bukai ba eksiden nya.
Ku iya madah agi, asil pansik tumu tetemuka tudah datai ari arah Kelingi Jalai Edward Jeli nuju ke Kelingi ke besemak enggau Saberkas.
“Sepengudah datai ba endur palan penusah nya nyadi, entukar ke dibai tudah tepawah ngagai sepiak jalai kiba lalu tama ke dalam parit,”
“Tudah lalu disahka parai ba endur penusah nyadi ari siku raban perubat ari Sepital Miri tu udah beguai sepengudah udah nerima ripot senentang penusah nya,” ku iya nambah agi.
Pun penusah nya nyadi ketegal pengilap deriba nya empu laban enda ulih mai entukar ke dibai iya.
Entudika nya, kes ditasat ba baruh seksyen 41 (1) Akta Perengka Pengangkut Jalai Alun 1987.
Tubuh tudah lalu dibai ngagai Sepital Miri dikena bejalaika atur ti patut.
