KUCHING: Menteri ba Opis Menteri Besai (Parlimen enggau Undang-Undang) Datuk Seri Dr Wan Junaidi Tuanku Jaafar nerangka senentang opis menteri nya semina deka ngubah pekara ba dalam Konstitusyen Perintah Besai ti relevan enggau Sempekat Malaysia 1963 (MA63).
Iya madahka, MA63 siti sempekat ke disain entara Britain, Malaya, Singapura, Sabah enggau Sarawak kena 9 Julai 1963 sereta sempekat nya udah diaku Serakup Bansa Beserakup (PBB).
Beduduk ari nya, Wan Junaidi nerangka, senentang sempekat nya enda ulih diubah lalu ubah ngagai Konstitusyen Perintah Besai tu chukup beguna dikena nentuka kuasa ngempu Sabah enggau Sarawak deka ulih diberi pulai baru.
“Tu sebaka enggau pekara ti udah dipesetuju ba dalam sempekat maya masuk Malaysia.
“Tanggungpengawa ti dipejalaika opis menteri aku enggau sukung ari Opis Luyar Menua iya nya seriris enggau sekeda pekara,” ku iya madah ba dalam siti penerang ti dikeluarka maya Hari Empat.
Iya madahka, entara pekara ti dikemeratka baka ngemetulka sekeda pekara ke disebut ba dalam Konstitusyen Perintah Besai ti meri penyaru ngagai reti Sempekat MA63 sereta ubah mesti digaga awakka seririh enggau pekara ti udah dipesetuju ba dalam MA63.
Kelimpah ari nya, deka meri pulai semua kuasa ngempu rayat Sabah enggau Sarawak ke enda dipejalaika berindik ari ubah konstitusyen tauka numbuhka undang-undang baru kenyau ari taun 1963.
Wan Junaidi ke mega Kaban Parlimen Santubong madahka, pekara nya dikena ngemujurka pekara ke udah ditetapka ba dalam Konstitusyen Perintah Besai tang enda semua dipejalaika.
“Tebal agi ba renggat bejalaika pekara nya ti ngaul pegawai perintah ke bejalaika tanggungpengawa sida,” ku iya madah agi.
