KUCHING : Siku lelaki diukum jil sepengelama empat bulan ketegal enchuri kipas apai iya.
Pemutus nya digaga Kort Majistret sepengudah iya ditemu salah ngereja pengawa nya.
Zairiman Zada Shelsada, ke beumur 29 taun, dipelabaka enchuri kipas mija ti diempu apai iya, Shelsada Lalzada, ke beumur 59 taun, kena 22 Jun 2021 urung pukul 6.30 lemai, ba rumah sida di Taman Riverview, Jalai Daya Bintawa.
Zairiman ngaku diri ngaga penyalah nya ngagai Majistret Zubaidah Sjarkawi sepengudah iya dituduh ba baruh Seksyen 380 Kanun Keseksaan.
Bepelasarka Seksyen nya mai ukum jil pemadu lama 10 taun enti ditemu salah.
Nitihka ripot, apai Zairiman meda anak iya ngambi lalu nepu kipas mija ke dalam kantung chelum, sebedau iya pansut mai motosikal ti diempu iya. Tang iya enda mai pulai kipas nya maya pulai baru ke rumah.
Apai Zairiman lalu nyangka anak iya udah nyual kipas nya ti berega RM50 lalu ngaga ripot polis.
Zairiman dipadahka ngembuan ulah ti enda manah baka selalu enchuri barang ti diempu apai iya sereta sida sebilik ke bukai lalu dijual iya.
Duit ti diulih iya dikena iya meli barang ke enda patut sereta main judi dalam tali arus. – TVS
