KUALA LUMPUR: Status pemadu baru senentang pemansang vaksin COVID-19 ti keterubah menua agi ba renggat makmal tauka proof of concept (POC).
Ngambi berita ari Bernama, pekara nya dikeluarka Sapit Menteri Pengerai II Datuk Aaron Ago Dagang maya Dewan Rakyat kena Hari Empat.
Sapit Menteri Pengerai II Datuk Aaron Ago Dagang madahka, pengawa pansik ngaga vaksin nya mungkur teknologi innactivated virus baka vaksin Sinovac sereta uji genetik tauka mRNA ungkup vaksin Pfizer.
Iya nerangka, pemansang vaksin nya dituaika raban pakar ari menua tu empu iya nya ba Institut Pansik Perubat (IMR) enggau kerejasama pakar ari Universiti Putra Malaysia sereta Institut Pansik Veterinar.
“Pengawa ngaga vaksin tu deka nguna timpuh ke lama sebedau ulih nyapai tikas pengelikun enggau pengasi nengah peresa klinikal renggat ketiga sereta bulih pemendar ari Seksyen Regulatori Farmasi Menua (NRPA).
“Pengawa pansik vaksin ini (COVID-19) iya nya siti bidang baru ti dipejalaika ba menua tu lalu semina ulih diguna sepengudah pemutus peresa klinikal ba jelu enggau mensia mandangka vaksin nya selamat,” ku iya madah ba sesi tanya saut aum parlimen maya Hari Empat.
Aaron mansutka jaku nya lebuh nyaut tanya Kaban Parlimen Jempol, Datuk Mohd Salim Sharif senentang pengerembai pemansang vaksin COVID-19 keterubah menua ti berengkah dipejalaika kenyau ari bulan November tahun taun siti nyin kemari.
Kelimpah ari nya, Aaron madahka anggar ungkus keterubah ba renggat POC nya lebih kurang RM1 juta nyentuk ke RM2 juta, seraya praklinikal dijangka deka ngaul RM3 juta nyentuk ke RM4 juta.
Iya mansutka jaku nya lebuh nyaut tanya ari Mohd Salim senentang ungkus pemansang vaksin di menua tu.
‘Mayuh macham renggat ngaga vaksin enggau pengawa kilang sereta bedajaka vaksin nya ti nguna ungkus bejuta ringgit.
“Kitai arapka pengawa tu ukai semina disukung ari duit turu ti disediaka perintah tang mega ngaul ari sektor peribit,” ku iya madah agi.
