KUCHING: Sarawak ngerikodka 1,413 kes baru positif COVID-19 ti nyadika penyampau kumulatif kes COVID-19 di nengeri tu manggai 221,042 naka hari empat.
Komiti Mutarka Penusah Ngenyit Nengeri (JPBN) Sarawak madahka, Kuching mengkang ngerikodka kes pemadu tinggi iya nya 387, ditangkan ke Miri (193) enggau Sibu (131).
Sarawak mega ngerikodka 20 kes pemati ketegal COVID-19 ti ngaul pesakit ke ngembuan penyakit raya baka kemi manis, tinggi darah, riman, penyakit tungkul sengayuh enggau ke bukai.
“Semua kes pemati nya dirikodka kenyau ari 7 September 2021 ke udah nyentuk ke 6 Oktober 2021,” ku JPBN Sarawak madah nengah siti penerang ti dikeluarka maya Hari Empat.
Kelimpah ari nya, nadai kluster baru diripotka enggau empat kluster udah punas ti ngaul Kluster Tembok Sri Aman, Sri Aman, Kluster Telok Batu, Meradong, Kluster Sungai Segan, Bintulu enggau Kluster Suchong Balut, Julau.
“Kluster ke nadai ngerikodka penambah kes iya nya 79 enggau semua kluster ke agi aktif di Sarawak iya nya 89 kluster,” ku iya madah agi.
Nangkan ke nya bisi enam buah genturung pendiau bejalaika Atur Nagang Pemindah Diteritka (PKPD) ti ngaul Rh. Philip, Ulu Strass, Rh. Waine Jimmy, Bt 2, Rumah Michael Balo Anak Jaul, Skim Rancangan Sepupok, Niah, Rumah Lidi, Ulu Babu, Debak, Rumah Ungah, Remambong enggau Rumah Mambu, Gerugu.
“PKPD ba Rh. Nyuin, Tanjung Bijat udah diketuka naka hari empat,” ku JPBN Sarawak madah agi.
